శ్రీనివాస సిరి నాట్య కళామండలి ఆధ్వర్యంలో ‘మోహిని భస్మాసుర’ పౌరాణిక పద్య నాటక ప్రదర్శన ఘనంగా నిర్వహించారు. కళామండలి వార్షికోత్సవం, దసరా బతుకమ్మ ఉత్సవాలను పురస్కరించుకుని, తెలంగాణ రాష్ట్ర చలనచిత్ర అభివృద్ధి సంస్థ సౌజన్యంతో చిక్కడపల్లిలోని శ్రీ త్యాగరాయ గానసభలో ఈ కార్యక్రమం నిర్వహించారు. ముద్దెన పంచనాదం రచించిన నాటకంలో కళాకారులు తమ నటనతో ప్రేక్షకులను ఆకట్టుకున్నారు. విష్ణుమూర్తిగా సిరిగిరి రామాచారి, నారదుడిగా సంపంగి కృష్ణ, భస్మాసురుడిగా పి. మోహాపారావు, శంకరుడిగా జి. అంజయ్య గౌడ్, మోహినిగా సురభి జ్యోతి, లక్ష్మిగా సురభి ప్రియాంక నటించారు. వి. మాధవరాజు పద్యాలకు రాగాలు సమకూర్చగా, బ్రహ్మం తబలా, కీబోర్డుతో సంగీత సహకారం అందించారు. పౌరాణిక నాటక రంగ అభివృద్ధికి సిరిగిరి రామాచారి చేస్తున్న కృషిని అతిథులు అభినందించారు. కార్యక్రమంలో పోరెడ్డి శ్రీనివాసరెడ్డి, యాదిరెడ్డి, కళ్లెం మురళీధర్‌రెడ్డి, వడ్ల రమేష్ చారి (షాద్‌నగర్, రంగారెడ్డి జిల్లా రంగస్థల కళాకారుల అభిమాన సమాఖ్య ప్రధాన కార్యదర్శి) తదితరులు పాల్గొన్నారు. కళాకారుల ప్రతిభను ప్రేక్షకులు అభినందించారు.

వృద్ధురాలి మెడలో బంగారు గొలుసు చోరీ.. నిందితుడు అరెస్ట్‌..
17.160 గ్రాముల బంగారు గొలుసు, నేరానికి ఉపయోగించిన ద్విచక్ర వాహనం స్వాధీనం
క్రికెట్‌ బెట్టింగ్‌ నష్టాలు, అప్పులే చోరీకి కారణమని పోలీసుల వెల్లడి.
వృద్ధురాలి మెడలోని బంగారు గొలుసును అపహరించి పరారైన చైన్‌ స్నాచర్‌ను చార్మినార్‌ జోన్‌ టాస్క్‌ఫోర్స్‌ పోలీసులు, సైదాబాద్‌ పోలీసులతో కలిసి అరెస్ట్‌ చేశారు. నిందితుడి నుంచి 17.160 గ్రాముల బంగారు గొలుసుతో పాటు నేరానికి ఉపయోగించిన ద్విచక్ర వాహనాన్ని స్వాధీనం చేసుకున్నారు.పోలీసుల వివరాల ప్రకారం.. రంగారెడ్డి జిల్లా బాలాపూర్‌, కొత్తపేట ప్రాంతానికి చెందిన మహమ్మద్‌ గౌస్‌ పాషా అలియాస్‌ గౌస్‌ (34) ద్విచక్ర వాహనాల మెకానిక్‌గా పనిచేస్తున్నాడు. క్రికెట్‌ బెట్టింగ్‌లో నష్టాలు రావడంతో పాటు అప్పులు పెరగడంతో ఆర్థిక ఇబ్బందుల్లో కూరుకుపోయినట్లు పోలీసులు తెలిపారు.ఈ క్రమంలో సైదాబాద్‌ పోలీస్‌స్టేషన్‌ పరిధిలోని గడ్డిఅన్నారం ప్రాంతంలో మల్లికార్జున స్వామి ఆలయం సమీపంలో ఓ వృద్ధురాలిని లక్ష్యంగా చేసుకున్నాడు. ఆమెను మాటల్లో పెట్టి మభ్యపెట్టి, మెడలో ఉన్న బంగారు గొలుసును లాక్కొని ద్విచక్ర వాహనంపై పరారయ్యాడు. ఈ వాహనాన్ని తాను పనిచేసే చోటు నుంచి తీసుకున్నట్లు పోలీసుల విచారణలో వెల్లడైంది.బాధితురాలి ఫిర్యాదు మేరకు కేసు నమోదు చేసిన సైదాబాద్‌ పోలీసులు, చార్మినార్‌ జోన్‌ టాస్క్‌ఫోర్స్‌ బృందంతో కలిసి దర్యాప్తు చేపట్టారు. సాంకేతిక ఆధారాలు, ఇతర సమాచారాన్ని విశ్లేషించి నిందితుడిని గుర్తించి అదుపులోకి తీసుకున్నారు. అతడి నుంచి చోరీ చేసిన 17.160 గ్రాముల బంగారు గొలుసు, పరారీలో ఉపయోగించిన ద్విచక్ర వాహనాన్ని స్వాధీనం చేసుకున్నారు.క్రికెట్‌ బెట్టింగ్‌, ఆర్థిక లావాదేవీల కారణంగా నేరాలకు పాల్పడే వారిపై నిఘా కొనసాగిస్తున్నామని పోలీసులు తెలిపారు. ముఖ్యంగా వృద్ధులు, ఒంటరిగా వెళ్లే మహిళలు అపరిచిత వ్యక్తుల పట్ల అప్రమత్తంగా ఉండాలని సూచించారు. అనుమానాస్పద వ్యక్తులు కనిపిస్తే వెంటనే పోలీసులకు సమాచారం అందించాలని కోరారు.

గర్భిణీ రాధ మృతిపై ఆగ్రహం..
వైద్యుల నిర్లక్ష్యంపై సమగ్ర విచారణ చేపట్టాలి
సీపీఎం జిల్లా నాయకులు రాజు, కాంగ్రెస్స్ పార్టీ ఎస్సీ విభాగంనియోజక వర్గం చైర్మెన్ జాంగారి రవి
తెలంగాణ పంచాయతీ రాజ్ చాంబర్స్ రాష్ట్ర ప్రధాన కార్యదర్శి బాధే పల్లి సిద్దార్థ
కాంగ్రెస్ యువ నాయకులు సింగపగా అనిల్

షాద్‌నగర్ ప్రభుత్వ ఆసుపత్రిని సందర్శించి వివరాలు సేకరించిన సీపీఎం, కాంగ్రెస్ నాయకులు

బాధ్యులపై చర్యలు తీసుకోవాలని డిమాండ్.. బాధిత కుటుంబానికి ఆర్థిక సహాయం అందించాలని విజ్ఞప్తి

షాద్‌నగర్ ప్రభుత్వ ఆసుపత్రిలో గర్భిణీ మహిళ రాధ మృతి ఘటనపై వివిధ రాజకీయ పార్టీల నాయకులు స్పందించారు. వైద్యుల నిర్లక్ష్యమే ఆమె మృతికి కారణమనే ఆరోపణల నేపథ్యంలో సోమవారం ఉదయం సీపీఎం జిల్లా నాయకులు రాజు, కాంగ్రెస్ పార్టీ ఎస్సీ విభాగం నియోజకవర్గ చైర్మన్ జాంగారి రవి, తెలంగాణ పంచాయతీరాజ్ చాంబర్స్ రాష్ట్ర ప్రధాన కార్యదర్శి బాధేపల్లి సిద్ధార్థ, కాంగ్రెస్ యువ నాయకుడు సింగపాగ అనిల్ కుమార్, ఎస్ఎఫ్ఐ నాయకుడు వడ్ల శ్రీకాంత్ తదితరులు షాద్‌నగర్ ప్రభుత్వ ఆసుపత్రిని సందర్శించారు. ఆసుపత్రిలోని పరిస్థితులను పరిశీలించి, ఆసుపత్రి సూపరింటెండెంట్ విష్ణువర్ధన్ ను కలిసి ఘటనకు సంబంధించిన వివరాలను అడిగి తెలుసుకున్నారు. ఈ సందర్భంగా జాంగారి రవి మాట్లాడుతూ.. వైద్యం కోసం ప్రభుత్వ ఆసుపత్రికి వచ్చిన దళిత పేద కుటుంబానికి చెందిన గర్భిణీ మహిళ రాధ ప్రాణాలు కోల్పోవడం అత్యంత బాధాకరమన్నారు. విధుల్లో నిర్లక్ష్యం వహించినట్లు తేలితే బాధ్యులైన వైద్యులు, సిబ్బందిపై కఠిన చర్యలు తీసుకోవాలని వైద్య ఆరోగ్య శాఖ అధికారులను కోరారు. ప్రభుత్వ ఆసుపత్రుల్లో గర్భిణులకు మెరుగైన వైద్య సేవలు, అత్యవసర చికిత్స అందేలా ప్రత్యేక పర్యవేక్షణ చేపట్టాలని విజ్ఞప్తి చేశారు.సీపీఎం జిల్లా నాయకులు రాజు మాట్లాడుతూ.. ఈ ఘటనపై జిల్లా వైద్య ఆరోగ్య శాఖ అధికారులు తక్షణమే స్పందించి సమగ్ర విచారణ జరపాలని కోరారు. రాధ మృతికి గల అసలు కారణాలను వెల్లడించాలని, ఘటనకు సంబంధించి ఎలాంటి అనుమానాలకు తావులేకుండా నిష్పక్షపాతంగా విచారణ చేపట్టాలని డిమాండ్ చేశారు. తెలంగాణ పంచాయతీరాజ్ చాంబర్స్ రాష్ట్ర ప్రధాన కార్యదర్శి బాధేపల్లి సిద్ధార్థ మాట్లాడుతూ.. ఘటన సమయంలో విధుల్లో ఉన్న వైద్యులు, సిబ్బంది పాత్రపై పూర్తిస్థాయిలో విచారణ జరిపించాలని, నిర్లక్ష్యం నిర్ధారణ అయితే బాధ్యులపై చట్టపరమైన చర్యలు తీసుకోవాలని అన్నారు. ఎస్ఎఫ్ఐ నాయకుడు వడ్ల శ్రీకాంత్ మాట్లాడుతూ.. మృతురాలి కుటుంబానికి ప్రభుత్వం తగిన ఆర్థిక సహాయం అందించి ఆదుకోవాలని కోరారు. ఇలాంటి విషాదకర ఘటనలు పునరావృతం కాకుండా ప్రభుత్వ ఆసుపత్రుల్లో వైద్య సేవలను మెరుగుపరచాలని నాయకులు విజ్ఞప్తి చేశారు. ఈ సమస్యను స్థానిక ఎమ్మెల్యే వీర్లపల్లి శంకర్ దృష్టికి తీసుకెళ్లి, ఆసుపత్రిలో నెలకొన్న పరిస్థితులను వివరించనున్నట్లు జాంగారి రవి తెలిపారు. ఈ కార్యక్రమంలో కొందుర్గు కాంగ్రెస్ ఎస్సీ విభాగం అధ్యక్షుడు, చెరుకుపల్లి సర్పంచ్ మల్లని యాదయ్య, ఎస్సీ సెల్ ప్రధాన కార్యదర్శి గడ్డం జంగయ్య, కావాలి నర్సింహులు తదితరులు పాల్గొన్నారు

ప్రభుత్వ పాఠశాల విద్యార్థులకు అండగా దాతలు.
కొండన్నగూడలో 50 మంది విద్యార్థులకు ఉచితంగా స్పోర్ట్స్ డ్రెస్‌లు, షూస్ పంపిణీ.
ప్రభుత్వ విద్యతోపాటు క్రీడారంగాన్ని ప్రోత్సహించడమే లక్ష్యం.

ప్రభుత్వ పాఠశాలల్లో చదువుతున్న విద్యార్థులను ప్రోత్సహించేందుకు దాతలు ముందుకు రావడం అభినందనీయమని పలువురు పేర్కొన్నారు. ఫరూక్‌నగర్ మండలం కొండన్నగూడ గ్రామంలోని మండల పరిషత్ ప్రాథమిక పాఠశాలలో చదువుతున్న 50 మంది విద్యార్థులకు కుమ్మరి బ్రహ్మయ్య, కమరి నవీన్ సహకారంతో ఉచితంగా స్పోర్ట్స్ డ్రెస్‌లు, షూస్ పంపిణీ చేశారు.గత ఏడాది కేవలం 12 మంది విద్యార్థులతో కొనసాగిన ఈ పాఠశాలలో ఉపాధ్యాయులు, గ్రామస్తులు, సర్పంచ్ సహకారంతో ప్రస్తుతం విద్యార్థుల సంఖ్య 50కి చేరడం విశేషం. ప్రైవేట్ పాఠశాలల నుంచి కూడా పలువురు విద్యార్థులు ప్రభుత్వ పాఠశాలలో చేరడం పట్ల గ్రామస్తులు హర్షం వ్యక్తం చేస్తున్నారు.విద్యార్థుల అభ్యున్నతితోపాటు క్రీడారంగంలోనూ వారు రాణించాలనే ఉద్దేశంతో దాతలు స్పోర్ట్స్ డ్రెస్‌లు, షూస్ అందజేశారు. గత కొన్ని సంవత్సరాలుగా నోట్‌బుక్స్, బ్యాగులు, పెన్నులు, స్పోర్ట్స్ డ్రెస్‌లు పంపిణీ చేస్తూ విద్యార్థులకు అండగా నిలుస్తున్నట్లు తెలిపారు. గ్రామ అభివృద్ధిలో భాగంగా పాఠశాలకు అవసరమైన సదుపాయాలు, టేబుళ్లు, గ్రామంలో సీసీ కెమెరాల ఏర్పాటుకు కూడా సహకారం అందించినట్లు పేర్కొన్నారు. భవిష్యత్తులోనూ విద్యార్థులకు అవసరమైన సహాయ సహకారాలు అందించేందుకు ముందుంటామని తెలిపారు.ఈ సందర్భంగా విద్యార్థుల విద్యాభివృద్ధికి, గ్రామ ప్రగతికి తమ వంతు సహకారం అందిస్తున్న కుమ్మరి బ్రహ్మయ్య, కమరి నవీన్‌లను గ్రామస్తులు ప్రత్యేకంగా అభినందించి శాలువాతో సత్కరించారు.ఈ కార్యక్రమంలో పాఠశాల ప్రధానోపాధ్యాయుడు దుర్గారావు, నూకరాజు, గ్రామ కార్యదర్శి నాగమణి, స్కూల్ చైర్మన్ ఈశ్వరమ్మ, సర్పంచ్ అనురాధ సురేష్ గౌడ్, ఉపసర్పంచ్ నరసింహులు యాదవ్, మాజీ సర్పంచ్ వై. శ్రీనివాస్ యాదవ్, మాజీ ఉపసర్పంచ్ జై ఆంజనేయులు గౌడ్, వార్డు సభ్యులు, గ్రామస్తులు పాల్గొన్నారు.

వ్యవసాయంలో కలుపు నివారణకు ఉపయోగించే గడ్డి మందు (పారాక్వాట్‌) అత్యంత ప్రమాదకరమైన విషపదార్థమని డాక్టర్ రామరాజు హెచ్చరించారు. ఈ మందును పొరపాటున లేదా ఆవేశంలో తీసుకుంటే శరీరంలోని కీలక అవయవాలు తీవ్రంగా దెబ్బతిని ప్రాణాపాయం సంభవించే అవకాశం ఉందని వివరించారు. ముఖ్యంగా ఊపిరితిత్తులు, కిడ్నీల పనితీరుపై తీవ్ర ప్రభావం చూపుతుందని తెలిపారు.
గడ్డి మందుల వినియోగం, నిల్వ విషయంలో రైతులు అప్రమత్తంగా ఉండాలని సూచించారు. పురుగుమందులు, కలుపు మందులను ఎట్టి పరిస్థితుల్లోనూ తాగునీటి సీసాల్లో నిల్వ చేయకూడదని, పిల్లలకు అందుబాటులో ఉంచకూడదని పేర్కొన్నారు. ఎవరైనా పొరపాటున ఈ మందు తీసుకుంటే లక్షణాల కోసం వేచి చూడకుండా వెంటనే అత్యవసర వైద్యసహాయం పొందాలని సూచించారు.
ఒక్క క్షణం నిర్లక్ష్యం కుటుంబంలో తీరని విషాదాన్ని నింపవచ్చని, ప్రతి రైతు ఈ ప్రమాదంపై అవగాహన కలిగి ఉండాలని డాక్టర్ రామరాజు సూచించారు. ఈ సమాచారాన్ని ప్రతి గ్రామానికి, ప్రతి రైతు కుటుంబానికి చేరవేయడం ద్వారా ప్రమాదాలను నివారించవచ్చని, ఒకరి అవగాహన మరొకరి ప్రాణాన్ని కాపాడే అవకాశం ఉందని పేర్కొన్నారు.

రాప్తాడు పాఠశాలలో బాలికపై రంపంతో దాడి.. ధర్మవరం రైల్వే స్టేషన్‌లో నిందితుడి అరెస్ట్

ప్రేమ నిరాకరించిందనే కోపంతోనే దాడి? తరగతి గదిలో కలకలం.. మరో విద్యార్థినికి గాయాలు

అనంతపురం జిల్లా రాప్తాడు మండల కేంద్రంలోని జిల్లా పరిషత్ ఉన్నత పాఠశాలలో పదో తరగతి విద్యార్థిని గోపికపై జరిగిన కిరాతక దాడి ఘటనలో పోలీసులు కీలక పురోగతి సాధించారు. దాడి అనంతరం పరారైన నిందితుడు హేమంత్‌ను ధర్మవరం రైల్వే స్టేషన్‌లో అదుపులోకి తీసుకున్నట్లు సమాచారం. ధర్మవరం మండలం నాగలూరు గ్రామానికి చెందిన హేమంత్‌.. బాధితురాలికి సమీప బంధువుగా గుర్తించారు.పాఠశాలలో రెండో పీరియడ్ తరగతులు జరుగుతున్న సమయంలో ఎలక్ట్రిక్ రంపంతో తరగతి గదిలోకి ప్రవేశించిన నిందితుడు గోపికపై దాడికి పాల్పడినట్లు తెలుస్తోంది. ఆమె గొంతు, చేతులపై తీవ్రంగా గాయపరిచినట్లు సమాచారం. దాడిని అడ్డుకునేందుకు ప్రయత్నించిన మరో విద్యార్థినికి కూడా గాయాలయ్యాయి. ఈ ఘటనతో పాఠశాల విద్యార్థులు, ఉపాధ్యాయులు తీవ్ర భయాందోళనకు గురయ్యారు.తీవ్రంగా గాయపడిన ఇద్దరు విద్యార్థినులను చికిత్స నిమిత్తం అనంతపురం ప్రభుత్వ సర్వజన ఆసుపత్రికి తరలించారు. గోపిక పరిస్థితి విషమంగా ఉన్నట్లు సమాచారం. కాగా, నిందితుడు హేమంత్ తల్లిదండ్రులు మరణించడంతో పదేళ్ల క్రితం నుంచి అయ్యవారిపల్లెలో అక్క వద్ద ఉంటున్నట్లు ప్రాథమిక విచారణలో వెల్లడైనట్లు తెలుస్తోంది.ప్రేమను నిరాకరించడమే దాడికి కారణమా? అనే కోణంలో పోలీసులు విచారణ చేపట్టారు. మరోవైపు పాఠశాల ప్రాంగణంలోకి మారణాయుధంతో వ్యక్తి ఎలా ప్రవేశించగలిగాడనే ప్రశ్నలు తల్లిదండ్రులు, స్థానికుల నుంచి వ్యక్తమవుతున్నాయి. విద్యార్థుల భద్రతపై ఆందోళన నెలకొంది. నిందితుడిపై కఠిన చర్యలు తీసుకోవాలని ప్రజలు డిమాండ్ చేస్తున్నారు. ఘటనకు సంబంధించిన పూర్తి వివరాలు పోలీసుల విచారణలో వెల్లడికావాల్సి ఉంది.

రంగారెడ్డి జిల్లా ఎలికట్ట గ్రామంలోని శ్రీశ్రీశ్రీ అంబాభవాని మాత దేవాలయంలో ప్రతి శుక్రవారం నిర్వహించే ప్రత్యేక పూజా కార్యక్రమాలు భక్తిశ్రద్ధలతో కొనసాగుతున్నాయి. ఇందులో భాగంగా శుక్రవారం అమ్మవారికి పంచామృత అభిషేకం, ప్రత్యేక అలంకరణ, కుంకుమార్చన, ధూపదీప నైవేద్య కార్యక్రమాలను ఘనంగా నిర్వహించారు.ఆలయ పూజారుల ఆధ్వర్యంలో జరిగిన ఈ పూజల్లో దేవాలయ అభివృద్ధి కమిటీ చైర్మన్ చాకలి చంద్రయ్య, కమిటీ సభ్యులు పాల్గొన్నారు. షాద్‌నగర్ మున్సిపల్ పట్టణానికి చెందిన పడబట్ల సత్యనారాయణ దంపతులు, వారి కుటుంబసభ్యులు అమ్మవారికి పంచామృతాలతో అభిషేకం నిర్వహించి ప్రత్యేక పూజలు చేశారు.ఈ సందర్భంగా ఆలయ ప్రాంగణం భక్తులతో సందడిగా మారింది. ఎలికట్టతో పాటు పరిసర గ్రామాల నుంచి భక్తులు పెద్ద సంఖ్యలో తరలివచ్చి అమ్మవారిని దర్శించుకుని మొక్కులు చెల్లించుకున్నారు. ప్రతి శుక్రవారం జరిగే పూజా కార్యక్రమాల్లో భక్తులు అధిక సంఖ్యలో పాల్గొని అమ్మవారి ఆశీస్సులు పొందాలని ఆలయ కమిటీ కోరింది.

షాద్‌నగర్ ప్రభుత్వ ఆసుపత్రిలో విషాదం.. తల్లి, శిశువు మృతి

రంగారెడ్డి జిల్లా షాద్‌నగర్ ప్రభుత్వ ఆసుపత్రిలో తీవ్ర విషాదం చోటుచేసుకుంది. ప్రసవం కోసం ఆసుపత్రికి వచ్చిన గర్భిణీ, కడుపులోని శిశువు మృతి చెందారు. కొందుర్గ్ మండలం చెరుకుపల్లి గ్రామానికి చెందిన రాధ (28)ను కుటుంబసభ్యులు శుక్రవారం ఉదయం 11 గంటల సమయంలో డెలివరీ కోసం ఆసుపత్రికి తీసుకొచ్చారు. నార్మల్ డెలివరీ అవుతుందని, కొద్దిసేపు వేచి ఉండాలని వైద్య సిబ్బంది చెప్పడంతో ఆమెను ఆసుపత్రిలో చేర్పించారు.అయితే ఉదయం నుంచి సాయంత్రం 5.30 గంటల వరకు వైద్య సిబ్బంది కాలయాపన చేశారని కుటుంబసభ్యులు ఆరోపిస్తున్నారు. రాధ పరిస్థితి విషమించి నోట్లో నుంచి నురగలు రావడంతో తీవ్రమైన ఫిట్స్ వస్తున్నాయని, ఇక్కడ చికిత్స చేయడం సాధ్యం కాదని చెప్పి హైదరాబాద్‌కు తీసుకెళ్లాలని సూచించినట్లు తెలిపారు. దీంతో ప్రైవేట్ అంబులెన్స్‌కు రూ.9 వేల వరకు చెల్లించి హైదరాబాద్‌కు తరలించగా, అప్పటికే తల్లి, కడుపులోని శిశువు మృతి చెందినట్లు అక్కడి వైద్యులు వెల్లడించారని కుటుంబసభ్యులు ఆవేదన వ్యక్తం చేశారు.మరోవైపు, కనీసం భర్తకు సమాచారం ఇవ్వకుండానే పోలీసులు మృతదేహాన్ని అక్కడి నుంచి తీసుకెళ్లారని బాధిత కుటుంబం ఆరోపిస్తోంది. తమకు మృతదేహాన్ని కూడా అప్పగించడం లేదని కన్నీరుమున్నీరవుతున్నారు. నడుచుకుంటూ ఆసుపత్రికి వచ్చిన రాధ వైద్యుల నిర్లక్ష్యంతోనే ప్రాణాలు కోల్పోయిందని కుటుంబసభ్యులు ఆరోపిస్తూ, ఘటనపై సమగ్ర విచారణ జరిపి బాధ్యులపై చర్యలు తీసుకోవాలని డిమాండ్ చేస్తున్నారు.
రాధ మృతిపై షాద్‌నగర్ ప్రభుత్వ ఆసుపత్రి వివరణ..

షాద్‌నగర్ సామాజిక ఆరోగ్య కేంద్రంలో గర్భిణీ రాధ (28), కడుపులోని శిశువు మృతిపై ఆసుపత్రి యాజమాన్యం ప్రకటన విడుదల చేసింది. అక్టోబర్ 30న మధ్యాహ్నం 12 గంటలకు తొమ్మిది నెలల గర్భంతో ఆమె ఆసుపత్రిలో చేరినట్లు తెలిపింది. సాయంత్రం 5.30 గంటల ప్రాంతంలో తీవ్ర ఫిట్స్ రావడంతో ఐదుగురు వైద్యుల బృందం CPR సహా అత్యవసర చికిత్స అందించినా ఫలితం లేకపోయిందని పేర్కొంది. బిడ్డనైనా కాపాడాలనే ఉద్దేశంతో ఉన్నత వైద్య కేంద్రానికి తరలించగా, అక్కడ కూడా శిశువును కాపాడలేకపోయారని విచారం వ్యక్తం చేసింది. ఋతురాలి కుటుంబానికి సానుభూతి తెలిపింది.

l

ఏపీకి షాద్‌నగర్ విద్యుత్ సిబ్బంది అండ
తుఫాను బీభత్సంతో దెబ్బతిన్న విద్యుత్ వ్యవస్థ పునరుద్ధరణకు నాలుగు బృందాలు
45 మంది సిబ్బందితో సహాయక చర్యలకు తరలింపు
అర్నాబ్ తుఫాను ప్రభావంతో ఆంధ్రప్రదేశ్‌లో విద్యుత్ వ్యవస్థ తీవ్రంగా దెబ్బతింది. తూర్పు గోదావరి, పశ్చిమ గోదావరి, కృష్ణా జిల్లాల్లో 16 వేలకుపైగా విద్యుత్ స్తంభాలు దెబ్బతినడంతో విద్యుత్ సరఫరా పునరుద్ధరణ సవాలుగా మారింది. ఈ నేపథ్యంలో బాధిత ప్రాంతాల్లో విద్యుత్ సేవలను త్వరితగతిన పునరుద్ధరించేందుకు షాద్‌నగర్ విద్యుత్ శాఖ సిబ్బంది ముందుకొచ్చారు.షాద్‌నగర్ డివిజన్ నుంచి సుమారు 45 మంది సిబ్బందితో కూడిన నాలుగు ప్రత్యేక బృందాలు ఏపీకి బయలుదేరాయి. దెబ్బతిన్న విద్యుత్ స్తంభాలు, ట్రాన్స్‌ఫార్మర్ల మరమ్మతులు చేపట్టి విద్యుత్ సరఫరాను పునరుద్ధరించడంలో ఈ బృందాలు సేవలందించనున్నాయి.ప్రకృతి వైపరీత్యంతో ఇబ్బందులు ఎదుర్కొంటున్న ప్రజలకు విద్యుత్ సేవలు అందించేందుకు షాద్‌నగర్ సిబ్బంది పొరుగు రాష్ట్రానికి వెళ్లడం ప్రాధాన్యత సంతరించుకుంది.రాజేంద్రనగర్ సర్కిల్‌కు చెందిన షాద్‌నగర్ డివిజన్ డీఈ శ్యామ్‌సుందర్ రెడ్డి ఈ కార్యక్రమాన్ని ప్రారంభించారు. ఈ కార్యక్రమంలో ఏడీఈలు సత్యనారాయణ, రవీందర్, ఏఈలు, ఎలక్ట్రికల్ కాంట్రాక్టర్లు పాల్గొన్నారు.

పెంజర్లలో బీఎస్ఎన్ఎల్ ఓఎఫ్‌సీ కేబుల్ ధ్వంసం.. కాంట్రాక్టర్‌పై కేసు

షాద్‌నగర్ నియోజకవర్గం కొత్తూరు మండలం పెంజర్ల గ్రామ పరిధిలో బీఎస్ఎన్ఎల్‌కు చెందిన ఆప్టికల్ ఫైబర్ (OFC) కేబుల్‌ను ఎలాంటి ముందస్తు అనుమతి లేకుండా కట్ చేసిన ప్రైవేట్ గ్యాస్ కనెక్షన్ కాంట్రాక్టర్‌పై పోలీసులు కేసు నమోదు చేశారు. గ్యాస్ పైప్‌లైన్, కనెక్షన్ పనులు నిర్వహించే క్రమంలో సంబంధిత వ్యక్తి బీఎస్ఎన్ఎల్‌కు చెందిన కీలకమైన ఫైబర్ కేబుల్‌ను అనధికారికంగా కట్ చేయడంతో టెలికాం నెట్‌వర్క్‌కు అంతరాయం ఏర్పడింది. దీంతో బీఎస్ఎన్ఎల్ సేవలకు నష్టం వాటిల్లే పరిస్థితి ఏర్పడింది.ఈ ఘటనపై బీఎస్ఎన్ఎల్ షాద్‌నగర్ అధికారులు తీవ్రంగా స్పందించారు. సంబంధిత కాంట్రాక్టర్‌పై చట్టపరమైన చర్యలు తీసుకోవాలని కోరుతూ అక్టోబర్ 29న కొత్తూరు పోలీస్ స్టేషన్‌లో ఫిర్యాదు చేశారు. అధికారుల ఫిర్యాదు మేరకు పోలీసులు సదరు వ్యక్తిపై ఎఫ్‌ఐఆర్ నమోదు చేశారు.ప్రభుత్వ టెలికాం సంస్థకు చెందిన కీలకమైన ఓఎఫ్‌సీ కేబుళ్లను అనుమతి లేకుండా తవ్వకాల ద్వారా దెబ్బతీయడం చట్టరీత్యా నేరమని బీఎస్ఎన్ఎల్ అధికారులు హెచ్చరించారు. ప్రైవేట్ గ్యాస్ కనెక్షన్లు, పైప్‌లైన్ పనులు, రోడ్డు తవ్వకాలు చేపట్టే కాంట్రాక్టర్లు తప్పనిసరిగా సంబంధిత శాఖల అనుమతులు తీసుకోవాలని సూచించారు. భవిష్యత్తులో ఇలాంటి ఘటనలు పునరావృతం కాకుండా బీఎస్ఎన్ఎల్ కేబుళ్లకు నష్టం కలగకుండా తగిన జాగ్రత్తలు పాటించాలని స్పష్టం చేశారు.

షాద్‌నగర్ ప్రభుత్వ ఆసుపత్రిలో విషాదం..
ప్రసవానికి వచ్చిన గర్భిణీ, కడుపులోని శిశువు మృతి
వైద్య సిబ్బంది నిర్లక్ష్యమే కారణమని భర్త ఆరోపణ..
సమగ్ర విచారణకు ఎమ్మార్పీఎస్ నాయకుడు ఆనేగాళ్ల ఆనంద్ మాదిగ డిమాండ్

షాద్ నగర్, అక్టోబర్ 30,తెలంగాణ ప్రజా గర్జన :–

రంగారెడ్డి జిల్లా షాద్‌నగర్ ప్రభుత్వ ఆసుపత్రిలో విషాద ఘటన చోటుచేసుకుంది. ప్రసవం కోసం ఆసుపత్రికి వచ్చిన గర్భిణీతో పాటు కడుపులోని శిశువు మృతి చెందడం కలకలం రేపింది. కొందుర్గ్ మండలం చెరుకుపల్లి గ్రామానికి చెందిన రమేష్ కుమార్, రాధా దంపతులకు ఈ విషాదం ఎదురైంది.మొదట కొందుర్గ్ ప్రభుత్వ ఆసుపత్రికి వెళ్లగా, అక్కడి నుంచి షాద్‌నగర్‌కు పంపించినట్లు బాధిత కుటుంబం తెలిపింది. షాద్‌నగర్ ఆసుపత్రిలో వైద్య సిబ్బంది సకాలంలో స్పందించకపోవడం, సరైన వైద్యం అందకపోవడమే మృతికి కారణమని భర్త రమేష్ కుమార్ ఆరోపించారు. పరిస్థితి విషమించడంతో హైదరాబాద్‌కు తరలించగా అప్పటికే తల్లీబిడ్డ మృతి చెందినట్లు వైద్యులు వెల్లడించారని తెలిపారు.ఈ ఘటనపై ఎమ్మార్పీఎస్ కొందుర్గ్ మండల సీనియర్ నాయకుడు ఆనేగాళ్ల ఆనంద్ మాదిగ తీవ్ర ఆవేదన వ్యక్తం చేశారు. ఘటనపై జిల్లా వైద్య ఆరోగ్య శాఖ అధికారులు సమగ్ర విచారణ జరిపించాలని, నిర్లక్ష్యం నిర్ధారణ అయితే బాధ్యులపై కఠిన చర్యలు తీసుకోవాలని డిమాండ్ చేశారు. బాధిత కుటుంబానికి తగిన ఆర్థిక సహాయం అందించాలని కోరారు. ప్రభుత్వ ఆసుపత్రుల్లో గర్భిణులకు అత్యవసర వైద్య సేవలు అందుబాటులో ఉండేలా చర్యలు తీసుకోవాలని విజ్ఞప్తి చేశారు.వైద్య నిర్లక్ష్యంపై వచ్చిన ఆరోపణలపై ఉన్నత అధికారుల విచారణలో వాస్తవాలు వెలుగులోకి రావాల్సి ఉంది.

షాద్‌నగర్ పట్టణంలో ట్రాఫిక్ నిబంధనల ఉల్లంఘనలను అరికట్టేందుకు పోలీసులు స్పెషల్ డ్రైవ్ నిర్వహించారు. పట్టణంలోని రామకృష్ణ థియేటర్ ఎదుట ట్రాఫిక్ పోలీసులు వాహనాలను క్షుణ్ణంగా తనిఖీ చేశారు. ఈ సందర్భంగా హెల్మెట్ ధరించకుండా ప్రయాణిస్తున్న వాహనదారులు, నకిలీ నంబర్ ప్లేట్లు ఉపయోగిస్తున్న వాహనాలు, పెండింగ్ చలాన్లు ఉన్న వాహనాలను గుర్తించారు. నిబంధనలు ఉల్లంఘించిన వాహనదారులకు జరిమానాలు విధించారు. వాహనదారులు రోడ్డు భద్రతను దృష్టిలో ఉంచుకుని తప్పనిసరిగా హెల్మెట్ ధరించాలని, ట్రాఫిక్ నిబంధనలు పాటించాలని పోలీసులు సూచించారు. వాహనాలకు సంబంధించిన పత్రాలను అందుబాటులో ఉంచుకోవాలని తెలిపారు. తనిఖీల్లో ట్రాఫిక్ సీఐ వెంకటేశం, ఎస్‌ఐ వెంకటేష్ పాల్గొన్నారు.

హైదరాబాద్‌లోని కృష్ణానగర్‌లో భారీ వర్షం కురిసింది. దీంతో కృష్ణానగర్‌ మెయిన్‌ రోడ్డుపై భారీగా వర్షపు నీరు ప్రవహించింది. ఈ క్రమంలో ఓ మందుబాబు వరద నీటిలో ఆడుతూ హల్‌చల్‌ చేశాడు. రోడ్డుపై నీరు ప్రవహిస్తున్నా పట్టించుకోకుండా నీటిలో ఆటలాడుతూ కనిపించాడు. వాహనాలు రాకపోకలు సాగించే ప్రధాన రహదారిపై అతడి ప్రవర్తన స్థానికులను ఆశ్చర్యానికి గురిచేసింది. భారీ వర్షంతో రోడ్లు జలమయమవగా, మరోవైపు మందుబాబు చేసిన హంగామా చర్చనీయాంశంగా మారింది. ఇందుకు సంబంధించిన దృశ్యాలు ప్రస్తుతం సామాజిక మాధ్యమాల్లో వైరల్‌గా మారాయి. వర్షపు నీటిలో ఇలాంటి నిర్లక్ష్యపు చర్యలు ప్రమాదాలకు దారితీసే అవకాశం ఉందని పలువురు అభిప్రాయపడుతున్నారు.

కరువు కష్టాల్లో ఉన్న పేదలకు .. రేషన్ ద్వారా 12 రకాల నిత్యావసరాలు ఇవ్వాలి.

ఎల్ నినో ప్రభావంతో తీవ్ర వర్షాభావ పరిస్థితులు ఏర్పడి కరువు సంభవించిన నేపథ్యంలో, ఉపాధి లేక తీవ్ర ఇబ్బందులు పడుతున్న నిరుపేదలను, వ్యవసాయ కార్మికులను ఆదుకునేందుకు ప్రభుత్వం వెంటనే సహాయక చర్యలు చేపట్టాలని తెలంగాణ వ్యవసాయ కార్మిక సంఘం (AIAWU) జిల్లా ఉపాధ్యక్షులు, షాద్‌నగర్ డివిజన్ కన్వీనర్ శ్రీను నాయక్ డిమాండ్ చేశారు. శుక్రవారం సుందరయ్య విజ్ఞాన కేంద్రంలో జరిగిన రాష్ట్ర వర్క్‌షాప్‌లో పాల్గొన్న ఆయన మాట్లాడుతూ.. కేంద్ర, రాష్ట్ర ప్రభుత్వాలు స్పందించి పేదలందరికీ ప్రతి నెలా 50 కేజీల బియ్యంతో పాటు 12 రకాల నిత్యావసర వస్తువులను ఉచితంగా పంపిణీ చేయాలని కోరారు. వాస్తవ పరిస్థితులకు అనుగుణంగా రాష్ట్రంలో కరువు మండలాల సంఖ్యను పెంచాలని, వి.బి.జి.రామ్ జి చట్టం ప్రకారం ప్రతి గ్రామంలో 200 రోజుల పనిదినాలు కల్పించి రోజువారీ వేతనం రూ.800 చెల్లించాలని అలాగే అర్హులైన ప్రతి ఒక్కరికీ కొత్త జాబ్ కార్డులు అందజేసి, పట్టణ ప్రాంతాల్లోనూ ఉపాధి హామీ పనులు కల్పించాలని డిమాండ్ చేశారు.ప్రభుత్వ హామీ మేరకు వ్యవసాయ కార్మికులకు 'ఇందిరమ్మ ఆత్మీయ భరోసా' కింద ఏడాదికి ₹12,000 తక్షణమే విడుదల చేయాలని, అర్హులైన నిరుపేదలందరికీ ఇందిరమ్మ ఇళ్లు మంజూరు చేస్తూ దళితులు, గిరిజనుల సంక్షేమానికి ప్రత్యేక చర్యలు తీసుకోవాలన్నారు. ఈ సమస్యల పరిష్కారానికై రాష్ట్రవ్యాప్తంగా ఆందోళన కార్యక్రమాలు నిర్వహించనున్నట్లు తెలిపారు.అందులో భాగంగా ఈ డిమాండ్ల సాధనకై నవంబర్ 6వ తేదీన చేపడుతున్న ‘ఛలో హైదరాబాద్’ కార్యక్రమాన్ని కార్మికులు, పేదలు పెద్ద ఎత్తున హాజరై జయప్రదం చేయాలని శ్రీను నాయక్ పిలుపునిచ్చారు.

నకిలీ ఆధార్, పాన్ కార్డులు తయారు చేస్తున్న జిరాక్స్ సెంటర్ నిర్వాహకుడి అరెస్ట్
ఆధార్, పాన్ కార్డుల్లో అనధికారికంగా మార్పులు చేస్తూ నకిలీ గుర్తింపు కార్డులు తయారు చేస్తున్న వ్యక్తిని శంషాబాద్ జోన్ టాస్క్‌ఫోర్స్, పహాడీషరీఫ్ పోలీసులు సంయుక్తంగా అరెస్ట్ చేశారు. పహాడీషరీఫ్ పోలీస్ స్టేషన్ పరిధిలోని జల్పల్లి శ్రీరామ్ కాలనీకి చెందిన చింతల మహదేవ్ (36) అనే జిరాక్స్ సెంటర్ నిర్వాహకుడు ఈ అక్రమ దందాకు పాల్పడుతున్నట్లు పోలీసులు తెలిపారు.బడ్వేల్‌లోని శ్రీరామ్ నగర్ కాలనీలో ‘కవిత ఏ టు జెడ్ ఆన్‌లైన్ సర్వీసెస్’ పేరుతో జిరాక్స్ సెంటర్ నడుపుతున్న మహదేవ్, ఆదాయం సరిపోకపోవడంతో సులభంగా డబ్బు సంపాదించేందుకు ఈ మార్గాన్ని ఎంచుకున్నాడు. ఆన్‌లైన్ సాఫ్ట్‌వేర్ల సహాయంతో ఆధార్, పాన్ కార్డుల్లో పేర్లు, ఫొటోలు, పుట్టిన తేదీలు, చిరునామాలను అక్రమంగా మారుస్తున్నాడు. పుట్టిన తేదీ మార్పునకు రూ.300, పూర్తి వివరాల మార్పునకు రూ.700 నుండి రూ.1,000 వరకు వసూలు చేస్తున్నాడు. ఈ నకిలీ కార్డులను కొందరు ప్రైవేట్ ఉద్యోగాలు, సిమ్ కార్డులు, ప్రభుత్వ పథకాల ప్రయోజనాల కోసం ఉపయోగిస్తున్నట్లు తేలింది.
విశ్వసనీయ సమాచారంతో దాడులు చేసిన పోలీసులు నిందితుడిని అదుపులోకి తీసుకున్నారు. అతని వద్ద నుంచి రూ.5,000 నగదు, 60 నకిలీ ఆధార్ కార్డులు, 2 పాన్ కార్డులు, ల్యాప్‌టాప్, ప్రింటర్, లామినేషన్ యంత్రం, మొబైల్ ఫోన్‌ స్వాధీనం చేసుకున్నారు.
ఈ ఆపరేషన్‌లో శంషాబాద్ జోన్ టాస్క్‌ఫోర్స్ ఇన్‌స్పెక్టర్ డి. కృష్ణమోహన్, ఎస్‌ఐలు ఎస్. శేషు, కె. మన్సూర్ అలీ, ఎన్. నర్సింహారావు, టాస్క్‌ఫోర్స్, పహాడీషరీఫ్ సిబ్బంది పాల్గొన్నారు. కేసు వివరాలను టాస్క్‌ఫోర్స్ శంషాబాద్-రాజేంద్రనగర్ జోన్ల అదనపు డీసీపీ కె.ఎస్. రావు వెల్లడించారు.

నకిలీ ఆధార్, పాన్ కార్డులు తయారు చేస్తున్న జిరాక్స్ సెంటర్ నిర్వాహకుడి అరెస్ట్


ఆధార్, పాన్ కార్డుల్లో అనధికారికంగా మార్పులు చేస్తూ నకిలీ గుర్తింపు కార్డులు తయారు చేస్తున్న వ్యక్తిని శంషాబాద్ జోన్ టాస్క్‌ఫోర్స్, పహాడీషరీఫ్ పోలీసులు సంయుక్తంగా అరెస్ట్ చేశారు. పహాడీషరీఫ్ పోలీస్ స్టేషన్ పరిధిలోని జల్పల్లి శ్రీరామ్ కాలనీకి చెందిన చింతల మహదేవ్ (36) అనే జిరాక్స్ సెంటర్ నిర్వాహకుడు ఈ అక్రమ దందాకు పాల్పడుతున్నట్లు పోలీసులు తెలిపారు.బడ్వేల్‌లోని శ్రీరామ్ నగర్ కాలనీలో ‘కవిత ఏ టు జెడ్ ఆన్‌లైన్ సర్వీసెస్’ పేరుతో జిరాక్స్ సెంటర్ నడుపుతున్న మహదేవ్, ఆదాయం సరిపోకపోవడంతో సులభంగా డబ్బు సంపాదించేందుకు ఈ మార్గాన్ని ఎంచుకున్నాడు. ఆన్‌లైన్ సాఫ్ట్‌వేర్ల సహాయంతో ఆధార్, పాన్ కార్డుల్లో పేర్లు, ఫొటోలు, పుట్టిన తేదీలు, చిరునామాలను అక్రమంగా మారుస్తున్నాడు. పుట్టిన తేదీ మార్పునకు రూ.300, పూర్తి వివరాల మార్పునకు రూ.700 నుండి రూ.1,000 వరకు వసూలు చేస్తున్నాడు. ఈ నకిలీ కార్డులను కొందరు ప్రైవేట్ ఉద్యోగాలు, సిమ్ కార్డులు, ప్రభుత్వ పథకాల ప్రయోజనాల కోసం ఉపయోగిస్తున్నట్లు తేలింది.
విశ్వసనీయ సమాచారంతో దాడులు చేసిన పోలీసులు నిందితుడిని అదుపులోకి తీసుకున్నారు. అతని వద్ద నుంచి రూ.5,000 నగదు, 60 నకిలీ ఆధార్ కార్డులు, 2 పాన్ కార్డులు, ల్యాప్‌టాప్, ప్రింటర్, లామినేషన్ యంత్రం, మొబైల్ ఫోన్‌ స్వాధీనం చేసుకున్నారు.
ఈ ఆపరేషన్‌లో శంషాబాద్ జోన్ టాస్క్‌ఫోర్స్ ఇన్‌స్పెక్టర్ డి. కృష్ణమోహన్, ఎస్‌ఐలు ఎస్. శేషు, కె. మన్సూర్ అలీ, ఎన్. నర్సింహారావు, టాస్క్‌ఫోర్స్, పహాడీషరీఫ్ సిబ్బంది పాల్గొన్నారు. కేసు వివరాలను టాస్క్‌ఫోర్స్ శంషాబాద్-రాజేంద్రనగర్ జోన్ల అదనపు డీసీపీ కె.ఎస్. రావు వెల్లడించారు.

ప్రజా సమస్యలపై బీఆర్ఎస్ పోరుబాట.. అధికారులపై ఒత్తిడి.

రాళ్లగూడలో ఎట్టకేలకు ప్రారంభమైన మురుగునీటి కాలువ పనులు..

పెండింగ్ రహదారి నిర్మాణ పనులపైనా నాయకుల దృష్టి

ప్రజా సమస్యల పరిష్కారమే లక్ష్యంగా శంషాబాద్ బీఆర్ఎస్ నాయకులు ప్రజల పక్షాన నిలుస్తూ అధికారులపై ఒత్తిడి తెస్తున్నారు. ప్రజలు ఎదుర్కొంటున్న సమస్యలను సంబంధిత అధికారుల దృష్టికి తీసుకెళ్లడమే కాకుండా, వాటి పరిష్కారం కోసం నిరంతరం కృషి చేస్తున్నారు. ఈ క్రమంలో శంషాబాద్ 119వ డివిజన్ పరిధిలోని రాళ్లగూడలో ఎన్నో రోజులుగా అసంపూర్తిగా నిలిచిపోయిన మురుగునీటి కాలువ, రహదారి నిర్మాణ పనులపై బీఆర్ఎస్ నాయకులు ప్రత్యేక దృష్టి సారించారు.రాళ్లగూడలో డ్రైనేజీ, రోడ్డు పనులు మధ్యలోనే నిలిచిపోవడంతో స్థానికులు తీవ్ర ఇబ్బందులు ఎదుర్కొంటున్నారు. ఈ సమస్యపై స్పందించిన 119వ డివిజన్ బీఆర్ఎస్ అధ్యక్షుడు కోణమొల్ల శ్రీనివాస్ ఆధ్వర్యంలో పార్టీ ముఖ్య నాయకులు గత వారం హెచ్ఎండీఏ, హెచ్‌జీసీఎల్ కార్యాలయాలను సందర్శించి సంబంధిత అధికారులకు ఫిర్యాదు చేశారు. పెండింగ్ పనుల వల్ల ప్రజలు ఎదుర్కొంటున్న ఇబ్బందులను వివరించి, వెంటనే పనులు చేపట్టాలని కోరారు.బీఆర్ఎస్ నాయకుల ఫిర్యాదుపై స్పందించిన అధికారులు సమస్యను పరిశీలించి తాజాగా మురుగునీటి కాలువ నిర్మాణ పనులను ప్రారంభించారు. ఎన్నో రోజులుగా ఎదురుచూస్తున్న డ్రైనేజీ పనులు ప్రారంభం కావడంతో స్థానికులు హర్షం వ్యక్తం చేస్తున్నారు. ప్రజా సమస్యలపై నాయకులు స్పందించి అధికారుల దృష్టికి తీసుకెళ్లడం వల్లే పనుల్లో కదలిక వచ్చిందని స్థానికులు అభిప్రాయపడుతున్నారు.
ఈ సందర్భంగా బీఆర్ఎస్ నాయకులు మాట్లాడుతూ.. ప్రజలకు ఇబ్బందులు ఎదురైనప్పుడు వారి పక్షాన నిలబడి సమస్యల పరిష్కారం కోసం పోరాడటమే తమ బాధ్యతని తెలిపారు. రాళ్లగూడలో డ్రైనేజీ పనుల ప్రారంభానికి 119వ డివిజన్ బీఆర్ఎస్ నాయకులతో పాటు కార్తీక్ రెడ్డి, మాజీ మంత్రి సబితా ఇంద్రారెడ్డి చొరవ, సహకారం అందించారని పేర్కొన్నారు. ప్రారంభమైన మురుగునీటి కాలువ పనులను నాణ్యతతో, త్వరితగతిన పూర్తి చేయాలని అధికారులను కోరారు.అయితే డ్రైనేజీ పనులు ప్రారంభమైనప్పటికీ రహదారి నిర్మాణ పనులు ఇంకా పెండింగ్‌లో ఉన్నాయని నాయకులు గుర్తుచేశారు. కాలువ నిర్మాణం పూర్తయిన వెంటనే రహదారి పనులు కూడా చేపట్టి ప్రజలకు రవాణా ఇబ్బందులు లేకుండా చూడాలని డిమాండ్ చేశారు. కేవలం ఫిర్యాదులతో సరిపెట్టకుండా పనులు పూర్తయ్యే వరకు అధికారులను నిరంతరం సంప్రదిస్తామని స్పష్టం చేశారు.
ప్రజా సమస్యలపై స్పందించి అధికారుల దృష్టికి తీసుకెళ్లిన నాయకుల కృషితో పనులు ప్రారంభం కావడం ఒకవైపు సానుకూల పరిణామంగా కనిపిస్తుండగా, మరోవైపు పెండింగ్‌లో ఉన్న రహదారి పనులు ఎప్పుడు పూర్తవుతాయనే దానిపై స్థానికులు ఎదురుచూస్తున్నారు.
ఈ కార్యక్రమంలో 119వ డివిజన్ అధ్యక్షుడు కోణమొల్ల శ్రీనివాస్, 118, 119 డివిజన్ల సమన్వయకర్త బుచ్చిరెడ్డి, ప్రధాన కార్యదర్శులు చిలుకమర్రి పరంధాములు, చిన్నగండు రాజేందర్, సీనియర్ నాయకుడు భైరమోని మల్లేష్, ఉపాధ్యక్షులు మురళి గౌడ్, దర్శన్ గౌడ్, బీసీ విభాగం అధ్యక్షుడు విజయ్ గౌడ్, యువజన విభాగం అధ్యక్షుడు జి.వి.పి. సాగర్, శివ గౌడ్, ప్రవీణ్ గౌడ్, దీపక్ గౌడ్, చంద్రశేఖర్, విద్యార్థి విభాగం అధ్యక్షుడు కనకటి శివ, సుశాంత్, శ్యామ్, వర్షిత్, రోహిత్ తదితరులు పాల్గొన్నారు.